تسعين في المية من اللي يمدحون
ما يمدحون الا ريا ومجاملة
تلقى نهايتها ديون وما ديون
والّا طلب فزعة ورقم معاملة
يمارسون الضحك من فوق الدقون
الله حسيبك يالعباد الهاملة
دايم مثل وارد عراوي يكفخون
ما يمسك بريكه ولا فرامله
كم شخص يمدح شخص من قوم البطون
وان قابل اللي يمدحه ما قام له
اما انا والله علاّم الظنون
اللي ما يستاهل مدح ما اجامله
لي صاحبٍ غالي وغيره ما يهون
بالطيب عاملني وانا بعامله
صحيبي القاضي زبن وش تعرفون
اخذ من الطيب الصفات الشاملة
ساسه من الروقه موسعة الطعون
والكامل الله والمزايا كاملة
كم حايلٍ كوماء يربّ ابها الصحون
وليا نشدت انشد زميلٍ زامله
حلال صعبات العقد مهما يكون
راع الفعول ان كان جات الصاملة
امدح ولا امدح غير من يستاهلون
انا وصل ماني براعي خاملة
